پاکستان کی تاریخ میں پہلی بار خواجہ سرا ؤں کے لیے قائم سکول کا 15اپریل سے آغاز ہوگا
دی جینڈر گارڈین نامی اسکول میں خواجہ سراؤں کو پرائمری سے انٹرمیڈیٹ تک کی 12سالہ تعلیم دی جائے گی
لاہور، اپریل 08 (ٹی این ایس): پاکستان کی تاریخ میں پہلی بار خواجہ سرا ؤں کی تعلیم اور پیشہ ورانہ تربیت کے لیے قائم کیے جانے والے سکول کا لاہور میں 15اپریل سے آغاز ہوگا۔ دی جینڈر گارڈین نامی اس اسکول میں خواجہ سرائوں کو پرائمری سے انٹرمیڈیٹ تک کی 12سالہ تعلیم دی جائے گی۔ اس کے علاوہ خواجہ سرا برادری کے افراد سکول سے ٹیکنکل تعلیم یعنی فیشن ڈیزائننگ، بیوٹیشن، ہیئر اسٹائلنگ،کڑھائی، موبائل و کمپیوٹر ریپئرنگ، گرافکس ڈیزائننگ، کمپیوٹر بیسک ایپلیکیشن اور دیگر کورسز کی تعلیم بھی حاصل کر سکیں گے۔ سکول کے بانی آصف شہزاد نے
نجی ٹی وی سے گفتگو کے دوران بتایا کہ یہ سکول ایکسپلورنگ فیوچر ایجوکیشن نامی غیر سرکاری تنظیم (این جی او) کے اشتراک سے بنایا جائے گا۔ خواجہ سرائوں کے اس سکول کی پہلی برانچ ماڈل ٹائون لاہور میں، دوسری برانچ اسلام آباد میں اور تیسری برانچ کراچی میں بنائی جائیں گی۔
