اسلام آبادمئی 9(ٹی این ایس) پاکستان تحریک انصاف کے چیئرمین عمران خان کا کہنا ہے کہ اصغر خان کیس سے ظاہر ہوا ن لیگ کو اسٹیبلشمنٹ نے کیسے تخلیق اور اسے فنڈ کیا۔تفصیلات کے مطابق چیئرمین تحریک انصاف عمران خان نے اپنیسماجی رابطے کی ویب سائٹ ٹویٹر پر ٹویٹ کرتے ہوئے کہا کہ اصغر خان کیس سے ظاہر ہوا کہ مسلم لیگ ن کو اسٹیبلشمنٹ نے کیسے تخلیق اور فنڈ کیا۔اپنے ٹویٹ میں انہوں نے کہا کہ کیس سے یہ بھی ظاہر ہوا کہ کس طرح لاڈلے کو تحفظ دیا گیا۔ ’اس اوپن اینڈ شٹ کیس کو سپریم کورٹ نے 2 دہائیوں تک نہیں سنا‘۔خیال رہے کہ چند روز قبل سپریم کورٹ میں اصغر خان کیس کو سماعت کے لیے مقرر کیا گیا تھا جس کے لیے سابق آرمی چیف اسلم بیگ اور سابق ڈی جی آئی ایس آئی اسد درانی نے درخواستیں دائر کر رکھی ہیں۔بعد ازاں سپریم کورٹ نے کیس میں نظر ثانی کی درخواستیں مسترد کردیں تھیں اور کیس پر عملدر آمد کا جائزہ لینے کے لیے سماعت ملتوی کردی تھی۔
