کراچی 21 جون(ٹی این ایس): چیئرمین پاکستان پیپلزپارٹی بلاول بھٹو زرداری نے سابق وزیراعظم بینظیربھٹو کی 65 ویں سالگرہ پراپنے پیغام میں کہا کہ والدہ کے مشن پرگامزن ہوں۔تفصیلات کے مطابق شہید محترمہ بینظیربھٹو کی سالگرہ کے موقع پر بلاول بھٹو زرداری نے کہا کہ بی بی نے خوشحال ، مضبوط اورجمہوری پاکستان کے لیے جدوجہد کی۔چیئرمین پیپلزپارٹی نے کہا کہ بی بی نے قوم کے بچوں کواپنی اولاد کی طرح سمجھا اورپیاردیا، بی بی کی جدوجہد آئندہ نسلوں کےلیے ولولے کا نشان ثابت ہوچکی ہے۔بلاول بھٹو نے کہا کہ بینظیربھٹونے 1994میں پاکستان سے پولیوکے خاتمےکا مشن شروع کیا تھا، بی بی نے ہی خواتین کو جائزحق دلوانے کی جدوجہد شروع کی۔انہوں نے کہا کہ ہم شہید بینظیربھٹوکے مشن کی تکمیل میں لگے رہیں گے، عوام 2018ء میں پیپلزپارٹی کو ہی دوبارہ اقتدارمیں لائیں گے۔واضح رہے کہ سابق وزیر اعظم اور پاکستان پیپلز پارٹی کی شہید چیئرمین محترمہ بینظیر بھٹو کی 65 ویں سالگرہ آج منائی جارہی ہے۔
