لاہورجولائی 28(ٹی این ایس)پنجاب اسمبلی کی نشست پی پی 270 میں ووٹوں کی دوبارہ گنتی کے بعد جمشید دستی کی عوامی راج پارٹی کے امیدوار کو شکست ہوگئی ۔مظفر گڑھ سے پنجاب اسمبلی کی نشست پی پی 270 سے عوامی راج پارٹی کے امیدوار اجمل چانڈیہ کو کامیاب قرار دیا گیا تھا، تاہم آزاد امیدوار عبدالحئی نے ووٹوں کی دوبارہ گنتی کی درخواست دی جس میں انہیں کامیاب قرار دیا گیا ہے۔ذرائع کے مطابق ووٹوں کی دوبارہ گنتی میں آزاد امیدوار عبدالحئی دستی 17 ووٹوں سے کامیاب ہوئے ہیں ۔اور ان کے 17 ہزار 717 ووٹ نکلے ہیں جب کہ اجمل چانڈیہ کے 17 ہزار 700 ووٹ ہیں۔ریٹرننگ افسر نے دوبارہ گنتی کے بعد آزاد امیدوار عبدالحئی کی کامیابی کا نوٹی فکیشن جاری کردیا ہے۔دوسری جانب عوامی راج پارٹی کے اجمل چانڈیہ نے دھاندلی کا الزام لگاتے ہوئے کہا ہے کہ گنتی میں ہمارا نمائندہ شامل نہیں تھا لہٰذا دھاندلی کے خلاف قانونی چارہ جوئی کریں گے۔
