نئی حکومت مسلہ کشمیر کو ترجیع پہ رکھےاور ہنگامی نوعیت کے اقدامات کرتے ہوئے جارحانہ سفارتی مہم شروع کرے
بھارت کی یہ خام خیالی ہے کہ وہ وحشیانہ طاقت کے استعمال سے کسی دن کشمیریوں کو تھکا اور ہرا کر انھیں اپنے جابرانہ تسلط پر آمادہ کرنے میں کامیاب ہوجائے گا: بیان
مظفر آباد اگست 15(ٹی این ایس): متحدہ جہاد کونسل کے چئیرمین اور امیر تحریک المجاہدین شیخ جمیل الرحمٰن نے یوم آزادی پر اہل پاکستان کو مبارکباد پیش کرتے ہوئے کہا کہ یہ یقیناَ 22 کروڑ مسلمانوں کے لئے خوشی و مسرت کا دن ہے تاہم جب تک کشمیریوں کو آزادی نہیں ملتی یہ جشن بے روح اور تشنہ تکمیل رہے گا۔
یوم آزادی پاکستان کے موقع پر اپنے تہنیتی پیغام میں شیخ جمیل الرحمٰن نے پاکستان کی نئی حکومت پر زور دیا ہے کہ وہ مسلہ کشمیر کو ترجیع پہ رکھے اور بھارت کیساتھ مذاکرات میں رائے شماری پر زور دے۔ انھوں نے کہا کہ پاکستان کو چاہئے کہ وہ کشمیریوں کو بھارت کے پنجہ استبداد سے نجات دلانے کے لئے ہنگامی نوعیت کے اقدامات کرتے ہوئے جارحانہ سفارتی مہم شروع کرے۔
انھوں نے مقبوضہ کشمیر میں بھارت کے یوم آزادی منانے کو انسانیت و حقوق کیساتھ ایک بھونڈا مذاق قرار دیتے ہوئے کہا کہ بھارت جو دراصل ہندو فسطائی طاقتوں کے تسلط میں ہے اپنی روش سے روس جیسے انجام سے دوچار ہوگا۔ انھوں نے کہا کہ ہم بھارتی عوام کے یوم آزادی منانے کے مخالف نہیں ہیں تاہم کشمیریوں کو غلام بنائے رکھنے پر بھارت کے تعلیم یافتہ اور باشعور طبقہ کی خاموشی افسوسناک ہے۔
انھوں نے کہا کہ بھارت و پاکستان کو ایک پلڑے میں تولا نہیں جاسکتا کہ ایک کشمیریوں کا حامی و معاون اور دوسرا ان کا مجرم و غاصب ہے۔
انھوں نے کہا کہ بھارت کی یہ خام خیالی ہے کہ وہ وحشیانہ طاقت کے استعمال سے کسی دن کشمیریوں کو تھکا اور ہرا کر انھیں اپنے جابرانہ تسلط پر آمادہ کرنے میں کامیاب ہوجائے گا۔ کشمیریوں کی جہد مسلسل اور چوتھی نسل کے نوجوانوں کا یہ جذبہ بتارہا ہے کہ بھارت کو ہر آنے والے دن کے ساتھ کشمیریوں کی مزاحمت میں اضافہ کا سامنا ہی کر نا پڑے گا۔ انھوں نے کہا کہ اعلیٰ تعلیم یافتہ کشمیری نوجوانوں کا جوق در جوق عسکری صفوں میں شامل ہونا اسکا بین عندیہ ہے اور شہداء کا خون ضرور رنگ لائے گا۔