گریڈ1 سے 16 تک دوسرے اضلاع کی بھرتی و من پسند افراد کو غیرقانونی ترقیوں اور مالی کرپشن اور بے ضابطگیوں کو کسی صورت میں برداشت نہیں کیا جائے گا ٗ گفتگو
ڈیرہ اسماعیل خان اگست 27 (ٹی این ایس)رکن قومی اسمبلی علی امین خان گنڈہ پور نے کہا کہ ڈیرہ اسماعیل خان کے ایک ایک ادارے کا تحفظ میرا فرض ہے اور بطور ایم این اے یہ فرض ہمیشہ ادا کرتا رہوں گا ،گومل یونیورسٹی ہمارا اثاثہ ہے، تحریک انصاف کے سربراہ عمران خان نے کرپشن کے خلاف جہاد کا آغاز کردیا ہے، گومل یونیورسٹی میں عہدوں پر براجمان کرپٹ مافیا کو کسی صورت میں برداشت نہیں کیا جائے گا ۔انہوں نے کہا کہ گریڈ1 سے 16 تک دوسرے اضلاع کی بھرتی و من پسند افراد کو غیرقانونی ترقیوں اور مالی کرپشن اور بے ضابطگیوں کو کسی صورت میں برداشت نہیں کیا جائے گا۔
وہ گومل یونیورسٹی ڈیرہ اسماعیل خان کے اساتذہ اور ملازمین کے نمائندہ وفد سے ملاقات کے دوران اظہار خیال کررہے تھے ۔انہوں نے کہا کہ مخصوص افراد کو کسی صورت میں اس بات کی اجازت نہیں دی جائے گی کہ وہ یہاں کے ملازمین اور اساتذہ کو ہراساں کریں، ان کے خلاف انکوائری کریں اور ان کو ذہنی طور پر پریشان کر کے ادارے کو آگے لے جانے کے بجائے پیچھے کی جانب لے جائیں۔اس موقع پر نمائند ہ وفد نے انہیں یونیورسٹی کے وائس چانسلر اور رجسٹرار کی زیر سرپرستی خلاف قانون، علاقہ و ادارہ دشمن اقدامات کے بارے میں تفصیلی آگاہ کیا۔ وفد سے گفتگو کرتے ہوئے علی امین گنڈہ پور نے کہا کہ عمران خان نے مثالی تعلیم کی فراہمی کا عزم کیا ہے۔ وزیراعظم عمران خان جلد ڈیرہ اسماعیل خان کا دورہ کر کے زرعی فیکلٹی سے اپ گریڈ ہو کر بننے والی زرعی یونیورسٹی کا افتتاح کریں گے ۔
