نئی تنظیم سازی کے لئے سابق گورنر سندھ محمد زبیر کی سر براہی میں 25 رکنی کمیٹی قائم کردی گئی
کراچی،ستمبر 10(ٹی این ایس ):مسلم لیگ ن کے صدر میاں محمد شہباز شریف کی ہدایت پر سندھ کی صوبائی تنظیم کو تحلیل کردیا گیااور نئی تنظیم سازی کے لئے سابق گورنر سندھ محمد زبیر کی سر براہی میں 25 رکنی کمیٹی قائم کردی گئی ہے۔ مسلم لیگ (ن) کی جانب سے جاری نوٹیفیکیشن کے مطابق مسلم لیگ (ن)نے سندھ میں ایک ماہ میں دوبارہ تنظیم سازی کا فیصلہ کیا ہے اس ضمن میںمسلم لیگ ن کے صدر میاں محمد شہباز شریف کی ہدایت پر ن لیگ سندھ کے صدر شاہ محمد شاہ نے سندھ کی تنظیم بشمول تمام ڈویژن،ضلعی اور دیگر تمام تنظیمیں تحلیل کردی ہیں۔
تنظیم سازی کے لئے ایک 25 رکنی کمیٹی قائم کی گئی ہے جس کے چیئرمین سابق گورنر سندھ محمد زبیر اور سیکر یٹری سلیم ضیا ہوں گے ۔کمیٹی 30 روز میں کام مکمل کرے گی۔
کمیٹی کے دیگر ارکان میں اسد جونیجو،مفتاح اسماعیل، کھیئل داس کوہستانی،یاسین آزاد،زین انصاری،منور رضا،خواجہ طارق نذیر،علی اکبر گجر،ناصر الدین محمود،قمر زمان راجپوت،سید شاہ زمان شاہ،میر امان اللہ خان تالپور،سید آفتاب علی شاہ،حافظ صادق سمیجو،احسان احمد سومرو،امام دین کھوسو،،ڈاکٹر درشن،خلیق الزمان راجہ انصاری،خالد شیخ،مہیش تالریجہ،سورٹھ تھیبو،پروین بشیر اور نیلم والگی شامل ہیں۔
ذرائع کے مطابق مسلم لیگ (ن))انتخابات کے بعد سندھ میں غیر فعال ہوچکی تھی اور بڑے پیمانے پر سیاسی سرگرمیاں بھی نظر نہیں آرہی تھیںجبکہ کارکنان بھی تنظیمی کاموں میں دلچسپی نہیں لے رہے تھے جس کے متعلق پارٹی قیادت کو کئی کارکنان کی جانب سے شکایت بھی کی گئی تھیں اس کے بعد پارٹی قیادت نے سندھ میں تنظیم سازی کا فیصلہ کیا تھا۔
