لاہور، جون 12 (ٹی این ایس): وزیر اعلی سردار عثمان بزدار نے کہا ہے کہ چائلڈ لیبر ایک سماجی ومعاشی مسئلہ ہے جس کے پس پردہ کئی عوامل کارفرما ہیں۔ دنیا بھر کے مروجہ قوانین کے مطابق بچوں سے مشقت لینا مجرمانہ فعل ہے۔ بچے پھولوں کی مانند ہو تے ہیں اوران کے حقوق کا تحفظ سب کی ذمہ داری ہے۔ بچے کسی بھی ملک کامستقبل اور قوم کا اثاثہ ہوتے ہیں۔ بچوں کی تعلیم و تربیت اور نگہداشت پرتوجہ دینا معاشرے کے ہر فردکافرض ہے۔ تسلسل کے ساتھ ٹیم ورک کے طورپر کام کرکے چائلڈ لیبر کا خاتمہ ممکن ہے۔ چائلڈ لیبر کے خاتمے کیلئے حکومت کیساتھ معاشرہ کو بھی اپنی ذمہ داریوں کا احساس کرنا چاہیئے۔ چائلڈلیبر کے خاتمے کیلئے موثر قانون سازی کے ذریعے اس لعنت کو ختم کرنے کیلئے جامع اقدامات کئے ہیں۔ چائلڈ لیبر کا مکمل خاتمہ ہمارا مشن ہے اور اس مشن کے حصول کیلئے کوئی کسر اٹھا نہ رکھی جائے گی۔ قوم کے نونہالوں کو چائلڈ لیبر کی لعنت سے چھٹکارا دلا کر دم لیں گے۔ آج کا دن تقاضا کرتا ہے کہ چائلڈلیبر و جبری مشقت سے معاشرے کو پاک کرنے کیلئے تمام طبقات اپنا موثر کردار ادا کریں۔ یہ دن منانے کا بنیادی مقصد بچوں کے مستقبل پر چائلڈ لیبر کے اثرات سے عوام کو آگاہ کرنا ہے۔ آج ہمیں چائلڈ لیبر کے خاتمے کیلئے کوششوں کومزید تیز کرنے کا عزم کرنا ہے۔
