لاہور اگست 16 (ٹی این ایس): تحریک آزادی کشمیر، سیاسی صورتحال اور پارٹی کے تنظیمی امور پر تبادلہ خیال۔ عثمان بزدار اوراعجاز چوہدری کی لائن آف کنٹرول پربھارتی فوج کی بلااشتعال فائرنگ،مقبوضہ کشمیر میں مسلسل کرفیواورکشمیری عوام پربھارتی ظلم و ستم کی شدید مذمت۔ یوم سیاہ پرکامیاب ریلی پر عوام سے اظہار تشکر۔ پنجاب کے دیگر ڈویژنل ہیڈ کوارٹر میں بھی کشمیری عوام کے ساتھ اظہار یکجہتی کیلئے ریلیوں کے انعقاد کا فیصلہ۔ سردار عثمان بزدار نے کہا کہ کشمیرکاپاکستان سے انمٹ رشتہ ہے۔ کڑے وقت اوربحران کی کیفیت میں کشمیر یوں کے ساتھ ہیں۔ پاکستان اور پاکستانی قوم پوری قوت کے ساتھ کشمیریوں کے ساتھ کھڑی ہے۔ پاکستان کشمیر کے بغیر نا مکمل ہے۔ بھارت ظلم و جبر سے زیادہ دیر تک کشمیر پر اپنا قبضہ برقرار نہیں رکھ سکتا- بھارت نے مقبوضہ کشمیر کی خصوصی حیثیت ختم کر کے آمرانہ اقدام کیا ہے۔ مودی سرکارکے ظلم کی شب ختم ہونے کے قریب ہے۔ کشمیر کی آزادی کا دن اب زیادہ دور نہیں۔ بھارت کوہرسطح پر رسوائی کا سامنا ہوگا۔ اعجاز چوہدری کا کہنا تھا کہ بھارت مقبوضہ کشمیر کے معاملے اپنی روایتی ہٹ دھرمی اورمکاری کا مظاہرہ کررہا ہے۔
دنیا کی کوئی طاقت کشمیر کو پاکستان سے جدا نہیں کرسکتی۔ کشمیر کل بھی ہمارا تھا اورکشمیر آج بھی ہمارا ہے۔ عثمان بزداراوراعجاز احمد چوہدری کی بھارتی فوج کی بلا اشتعال فائرنگ سے شہید ہونے والے فوجی جوانوں کی بہادری اور جرأت کو سلام۔ سردار عثمان بزدار نے کہا پاک فوج نے بھارتی فوجیوں کو جہنم واصل کرکے دشمن کوبھر پور جواب دیا۔ دفاع وطن کیلئے اپنی قیمتی جانوں کا نذرانہ پیش کرنے والے فوجی جوان ہمارے ہیرو ہیں۔ وطن کی مٹی پر فدا ہونے والے پاک فوج کے جوانوں کی عظیم قربانی کو سلام پیش کرتے ہیں۔ شہید فوجی جوان ہمار ے ماتھے کا جھومر ہیں۔ وطن پر نثار ہونے والے شہداء کی عظیم قربانی پر ناز ہے۔ پاکستان کی مسلح افواج دفاع وطن کیلئے ہمہ وقت تیار ہے۔ پاکستانی قوم اپنی بہادر مسلح افواج کے ساتھ کندھے سے کندھا ملا کر کھڑی ہے۔ بھارت کا جارحیت پسند رویہ خطے کے امن کیلئے خطرہ ہے۔ پارٹی کی گورننگ باڈی کا اجلاس 20 اگست کو پنجاب سیکرٹریٹ میں منعقد ہوگا۔ وزیراعلیٰ پنجاب عثمان بزدار پنجاب سیکرٹریٹ کا دورہ کریں گے۔
