اسلام آباد جولائی20(ٹی این ایس)حکومت پاکستان اور فرانسیسی ترقیاتی ادارہ (اے ایف ڈی) کے درمیان 16 کروڑ 50 لاکھ یورو کے آسان قرضے کا معاہدہ طے پا گیا۔ سیکرٹری اقتصادی امور ڈویژن شاہد محمود، پاکستان میں فرانسیسی سفیر مارٹین ڈورنس اور اے ایف ڈی کے کنٹری ڈائریکٹر جیکی امپرو نے معاہدہ پر دستخط کئے۔ وفاقی وزیر خزانہ سینیٹر اسحاق ڈار بھی اس موقع پر موجود تھے۔ یہ معاہدہ توانائی کے شعبہ کے منصوبوں بشمول پاور ٹرانسمیشن انہانسمنٹ انوسٹمنٹ اور منگلا پاور پلانٹ بحالی منصوبہ کی فنانسنگ سے متعلق ہے۔ اس موقع پر وزیر خزانہ اسحاق ڈار نے اظہار خیال کرتے ہوئے فرانسیسی ترقیاتی ادارہ (اے ایف ڈی) کی جانب سے پاکستان کی اقتصادی ترقی کیلئے مسلسل حمایت اور تعاون کو سراہا۔ فرانسیسی سفیر نے اس موقع پر کہا کہ فرانس اور پاکستان کے درمیان دیرینہ تاریخی تعاون قائم ہے۔ فرانس پاکستان کو مختلف شعبوں میں تعاون فراہم کرنے کا خواہاں ہے۔ اس موقع پر بتایا گیا کہ اس پروگرام کا مقصد توانائی کے شعبہ کو مزید رعایتی، قابل اعتماد اور پائیدار بنانا ہے جو نیشنل پاور پالیسی پر عملدرآمد کے ذریعے ملک کی اقتصادی نمو میں معاون ثابت ہو گا
