کراچیجولائی20 (ٹی این ایس ) ماہر آرتھوپیڈک سرجن ڈاکٹر عمران علی شاہ نے آرٹس کونسل آف پاکستان کراچی کے ممبران کیلئے اپنی فیس میں 50فیصد جبکہ عیسیٰ لیب نے اپنے تمام ٹیسٹوں میں 30فیصد کمی کا اعلان کردیا۔جس کا اطلاق میڈیکل اینڈ سوشل ویلفیئر کمیٹی ، آرٹس کونسل آف پاکستان کراچی کے ڈاکٹر محبوب کے ریکومنٹیشن پر کیاجائے گا۔ اس بات کا اعلان گزشتہ روز آرٹس کونسل کراچی میں منعقدہ سیمینار بعنوان ’’ہڈیوں کے بھر بھرا پن‘‘ ’’ Osteophorosis‘‘میں میڈیکل اینڈ سوشل ویلفیئر کمیٹی کے چیئرمین ڈاکٹر ایس ایم قیصر سجاد نے کیا۔ اس موقع پر ڈاکٹر قیصر سجاد نے مزید کہاکہ محمد احمد شاہ کی قیادت میں آرٹس کونسل کے ممبران کی فلاح و بہبود کے لئے دن رات کام کررہے ہیں، میڈیکل کے حوالے سے بھی مزید سیمینار اور کیمپ منعقد کئے جائیں جس سے ممبران کو فائدہ ہوگا۔آرٹس کونسل میں ممبران کے لئے 3بجے سے لیکر7بجے تک روزانہ ڈاکٹر موجود ہوتے ہیں۔ سیمینار میں ہڈیوں کا بھر بھرا پن یعنی ’’Osteophorosis‘‘ کے حوالے سے ہڈیوں کی مضبوطی کی جانچ کا خصوصی ٹیسٹ ’’BMD‘‘ مفت کئے گئے۔ جبکہ سیمینار سے گفتگو کرتے ہوئے ماہر آرتھوپیڈک سرجن ڈاکٹر عمران علی شاہ نے کہاکہ ہڈیوں کی بیماری آج کل بہت تیزی سے ہمارے معاشرے میں پھیل رہی ہے، جس کی وجہ عموماً ہماری غذائی عادات اور رہن سہن کا طریقہ ہے۔ ہماری غذاؤں میں وٹامن ، کیلشیم اور دیگر معدنیات کی مطلوبہ مقدار نہیں پائی جاتی جس کی وجہ سے چھوٹی عمر میں بھی ہڈیوں کے مسائل جنم لینے لگتے ہیں۔انہوں نے کہاکہ ہمیں اپنی غذاؤں میں ایسی اشیاء کا استعمال کرنا چاہئے جس سے ہمارے جسم میں وٹامن اور کیلشیم کی ضروریات پوری ہوسکیں جبکہ دھوپ کا استعمال تقریباً5منٹ دوپہر کے وقت ضرور ہونا چاہئے، آپ چاہے چہل قدمی کرلیں یا تھوڑی دیر دھوپ میں بیٹھ جائیں۔ اس کے ساتھ ساتھ روزانہ کی بنیاد پر چند ورزشیں بھی معمول کا حصہ ہونا چاہئیں۔ڈاکٹر عمران نے مزید کہاکہ ہڈیوں کی بیماری ایک عام انسان میں بھی ہوسکتی ہے ضروری نہیں کہ جب چوٹ لگے تو آپ ٹیسٹ کروائیں ہڈیوں کا ٹیسٹ ہر شخص کو کرانا چاہئے۔ تقریب کے آخر میں میڈیکل اینڈ سوشل ویلفیئر کمیٹی کے چیئرمین ڈاکٹر ایس ایم قیصر سجاد اور پریس اینڈ پبلی کیشن کمیٹی کے چیئرمین بشیر سدوزئی نے آرٹس کونسل کی جانب سے مہمانوں کو گلدستے پیش کئے۔
