اسلام آباد جنوری 09 (ٹی این ایس): وفاقی وزیر مواصلات مراد سعید نے کہا ہے کہ 2019ء معیشت کے استحکام کا سال تھا ، 2020ء کے ثمرات عوام تک پہنچانے کا سال ہے، اسلام آباد میں53 ہزار مستحق افراد کو صحت کارڈ مارچ تک جاری کئے جائیں گے، تمام سابق قبائلی اضلاع کے رہنے والوں کو 2020ء تک یہ کارڈ جاری کئے جائیں گے۔ جمعرات کو قومی اسمبلی میں پالیسی بیان دیتے ہوئے مراد سعید نے کہا کہ 2019 میں خسارے میں چلنے والے ادارے بہتری کی سمت گامزن ہوئے اس کے بعد اس کے ثمرات عوام تک پہنچانے ہیں، صحت انصاف کارڈ پورے ملک کے لئے شروع ہوگیا ہے، 57 لاکھ افراد کے لئے یہ کارڈ جاری کئے جا چکے ہیں۔
انہوں نے قومی اسمبلی کو بتایا کہ اسلام آباد میں53 ہزار مستحق افراد کو صحت کارڈ مارچ تک جاری کئے جائیں گے، تمام سابق قبائلی اضلاع کے رہنے والوں کو 2020ء تک یہ کارڈ جاری کئے جائیں گے، پورے صوبہ کے پی کے میں مستحق افراد کو صحت کارڈ کے ذریعے علاج کی سہولت میسر آسکے گی، اس کے علاوہ ملک بھر میں ایک کروڑ افراد کو صحت انصاف کارڈ کا اجراء اسی سال یقینی بنایا جائیگا جس سے سات لاکھ 20 ہزار روپے تک مفت علاج یا کسی بھی سرکاری یا بہترین پرائیویٹ ہسپتال میں کرایا جاسکے گا۔
انہوں نے بتایا کہ اراکین اپنے اپنے حلقوں میں صحت انصاف کارڈ کے لئے کام کریں تاکہ مستحق لوگوں کو یہ کارڈ مل سکیں۔ انہوں نے بتایا کہ 2019ء معیشت کے استحکام کا سال تھا ، 2020ء اس کے ثمرات عوام تک پہنچانے کا سال ہے، یوٹیلٹی سٹورز پر مستحق افراد کوسبسڈی دینے کے لئے 6 ارب روپے جاری کردیئے گئے ہیں، وزیراعظم عمران خان نے اقتدار میں آنے کے بعد سردی میں شاہرائوں پر سونے والوں کے لئے شیلٹر پروگرام شروع کیا جس سے اس وقت لاکھوں افراد مستفید ہو رہے ہیں۔
ڈاکٹر نفیسہ شاہ کے اٹھائے گئے نکات کا جواب دیتے ہوئے مراد سعید نے کہا کہ احساس پروگرام پاکستان کی تاریخ کا غربت کے خاتمہ کا سب سے بڑا پروگرام ہے، یہ صرف بی آئی ایس پی تک محدود نہیں ہے، اس کا دائرہ کار بہت وسیع ہے، اس میں طالب علموں‘ نوجوانوں‘ بیوائوں کے لئے امداد اور قرضوں کی سہولت دی گئی ہے، جن لوگوں کو بی آئی ایس پی سے نکالا گیا ان کا ڈیٹا موجود ہے۔
انہوں نے کہا کہ صحت انصاف کارڈ خیبرپختونخوا میں 2014ء میں شروع ہوا، اب پورے پاکستان میں اس کا اطلاق ہوگا۔ پورے ملک میں 5.7 ملین خاندانوں کو صحت انصاف کارڈز فراہم کئے جارہے ہیں۔نکتہ اعتراض پر شیر اکبر خان نے کہا کہ بونیر میں یوٹیلٹی سٹورز بند ہو چکے ہیں‘ بونیر سمیت ملک بھر میں بند ہونے والے یوٹیلٹی سٹورز کھولے جائیں۔ اس کے جواب میں وزیر مملکت برائے پارلیمانی امور علی محمد خان نے کہا کہ بونیر میں جو بھی یوٹیلٹی سٹورز بند کئے گئے ہیں ان کی نشاندہی کی جائے۔ انہیں کھولنے کے احکامات جاری کردیئے جائیں گے۔
