اسلام آباد جولائی 30(ٹی این ایس )عوامی مسلم لیگ کے سربراہ شیخ رشید احمد نے کہاہے کہ اس ملک میں عظیم ادارے ٗ عظیم فوج اور عظیم ججز ہیں ٗ جب تک تمام ادارے اور عمران جیسا لیڈر ہے ملک کو کوئی نقصان نہیں پہنچا سکتا ٗ حدیبیہ پیپر ملز کا کیس کھلا تو قوم پاناما کو بھول جائیگی ٗ مولانا فضل الرحمان نے اسلام کے بجائے اسلام آباد کو ترجیح دی۔ اتوار کو پریڈ گراؤنڈ میں تحریک انصاف کے ’’یوم تشکر‘‘ جلسہ عام سے خطاب کرتے ہوئے عوامی مسلم لیگ کے سربراہ شیخ رشید نے کہاکہ میں نے پہلے ہی کہا تھا کہ نواز شریف صادق اور امین نہیں ہیں اور اسی لیے نواز شریف چاہتے تھے کہ انہیں غیر قانونی طور پر نکالا جائے۔انہوں نے کہا کہ میں نے کہا تھا کہ یہ پانچوں میں فیل ہو گا اور قربانی سے پہلے ہی قربانی ہوگی جب کہ نواز شریف نے 3 دفعہ کہا کہ شیخ رشید اسمبلی میں نہیں ہو گا۔سربراہ عوامی مسلم لیگ کا کہنا تھا کہ میں نے اس قوم کو کہا کہ2017 ان کا آخری سال ہو گا اور نواز شریف ، شہباز شریف اور ان کی اولادیں جیل میں ہوں گی لیکن ہم ظالم نہیں جیل میں انہیں اے کلاس دیں گے۔انہوں نے کہا کہ شہباز شریف کو لایاجارہا ہے اور شہباز شریف یاد رکھو یہ برادر یوسف ہے، قطری گاڑی میں سیف الرحمان آیا اور کہا خاقان کو وزیراعظم بناؤ۔شیخ رشید احمد نے کہاکہ اس ملک میں عظیم ادارے، عظیم فوج اور عظیم ججز ہیں اور جب تک تمام ادارے اور عمران جیسا لیڈر ہے ملک کو کوئی نقصان نہیں پہنچا سکتا۔شیخ رشید احمد نے کہاکہ پاکستانی چور کی چور سے نہیں بلکہ چور سے چوکیدار کی تبدیلی چاہتے ہیں اسی لیے عمران نے مجھے کہا شاہد خاقان کیخلاف کاغذات جمع کراؤ ہم سپورٹ کریں گے۔ شیخ رشید احمد نے دعویٰ کیا کہ نواز شریف میں ایٹمی دھماکہ کرنے کی ہمت نہیں ہے ٗ اصل میں ایٹمی دھماکہ کرنے میں راجہ ظفر الحق ٗگوہر ایوب اور میرا کردار ہے۔ انہوں نے کہا کہ حدیبیہ پیپر ملز کا کیس کھلا تو قوم پاناما کو بھول جائے گی اور پھر دونوں بھائی اور ان کے بچے جیل میں ہوں گے۔مولانا فضل الرحمان کے حوالے سے شیخ رشید کا کہنا تھا کہ کچھ لوگ ہوتے ہیں جو پیسے کے لئے جیتے ہیں اور کچھ اقتدار کے لئے جیتے ہیں لیکن مولانا فضل الرحمان نے اسلام کے بجائے اسلام آباد کو ترجیح دی، انہوں نے اسلام کو بری طرح بدنام کیا۔۔
