اسلام آباد 11 اپریل 2022 (ٹی این ایس): کراچی اسٹاک ایکسچینج میں آج تیزی کا رجحان رہا اور 100 انڈیکس 1500پوائنٹس سے زائد اضافے کےساتھ 45ہزار 500 کی حد عبور کر گیا۔
پیر کو دن کا آغاز 44ہزار 444.58 پوائنٹس کے ساتھ ہوا اور دوپہر ساڑھے 12بجے تک ایک ہزار 541.57 پوائنٹس یا 3.47فیصد اضافہ ریکارڈ کیا گیا۔
ماہرین اسٹاک ایکسچینج میں تیزی کی وجہ ملک میں دو ہفتے سے جاری سیاسی عدم استحکام میں خاتمے کو قرار دے رہے ہیں۔
تحریر جاری ہے عارف حبیب کارپوریشن کے احسن محنتی نے کہا کہ نئے وزیراعظم کے لیے ووٹنگ سے قبل پاکستان اسٹاک ایکسچینج میں تیزی کا رجحان رہا۔
ان کا کہنا تھا کہ تحریک عدم اعتماد پر ووٹنگ کے بعد سیاسی غیریقینی صورتحال بہتر ہونے کے نتیجے میں اسٹاک مارکیٹ اور روپے کی قدر میں نمایاں بہتری آئی ہے۔
یہ بھی پڑھیں: ڈالر مزید 3 روپے 25 پیسے مہنگا، 189.25 روپے کی بلند ترین سطح پر پہنچ گیا
انٹر مارکیٹ سیکیورٹیز میں ہیڈ آف ریسرچ رضا جعفری نے کہا کہ چند ہفتوں سے ملک میں جاری سیاسی ڈرامہ ختم ہونے کے بعد کے ایس ای 100 انڈیکس میں تین فیصد زائد اضافہ ہوا۔
انہوں نے کہا کہ اب تمام تر توجہ معیشت اور مسلم لیگ(ن) کی کارکردگی کے ساتھ ساتھ اس بات پر ہو گی کہ وہ کتنی جلدی انٹرنیشنل مانیٹری فنڈ سے رجوع کرتے ہیں اور انتظامی بہتری لاتے ہیں۔
