پاکستان تحریک انصاف کے ایڈیشنل سیکرٹری جنرل علی نواز اعوان نے کہا ہے کہ مارگلہ ایونیو اسلام آباد کے عوام کے لئے عمران خان اور اسد عمر کا تحفہ ہے جس پر اب شوباز شریف افتتاح کی تختیاں لگوا رہا ہے جمعرات کو اپنے ایک بیان میں سابق رکن قومی اسمبلی علی نواز اعوان نے کہا کہ مارگلہ ایونیو کا افتتاح سابق وزیر اعظم عمران خان نے اپریل 2021 میں کیا جبکہ باقاعدہ کام کا سنگ بنیاد سابق وفاقی وزیر منصوبہ بندی اسد عمر نے 24 جون 2021 کو رکھا یہ 35 کلو میٹر طویل منصوبہ پشاور روڈ سے شروع ہو کر بہارہ کہو کو بائی پاس کرکے مری سے جوڑتا ہے۔
انہوں نے کہا کہ اس منصوبے کا مقصد مری اور گلیات جانے والے سیاحوں کو الگ رستہ فراہم کرنا اور شہر کو ٹریفک کے ہجوم سے بچانا تھا انہوں نے کہا کہ الحمدللہ آج یہ منصوبہ پایہ تکمیل تک پہنچ چکا ہے جس پر موجودہ حکومت کریڈٹ لے رہی ہے حالانکہ اس منصوبے کا تمام تر کام ہماری حکومت کے دور میں مکمل ہو چکا تھا علی نواز اعوان نے کہا کہ پی ٹی آئی نے اسلام آباد کے لیے دیر پا منصوبے بنائے جس سے عام شہریوں کو سہولیات ملیں جن میں مارگلہ ایونیو، 10 ایونیو ، آئی جے پی روڈ، سیون ایونیو فلائی اوور، پی ڈبلیو ڈی انٹرچینج، راول ڈیم فلائی اوور اور دیگر منصوبے شامل ہیں
