حسن ابدال (ٹی این ایس) تھانہ صدر حسن ابدال کے علاقہ میں پیش آنے والے پانچ افراد کے قتل کے افسوسناک واقعہ کا ڈسٹرکٹ پولیس آفیسر اٹک سردار موارہن خان نے فوری نوٹس لے لیا۔ واقعہ کی اطلاع ملتے ہی ایس پی انوسٹی گیشن اٹک زینب ایوب، ڈی ایس پی حسن ابدال یاسر مطلوب کیانی اور ایس ایچ او تھانہ صدر حسن ابدال راجہ طاہر بشیر بھاری نفری کے ہمراہ موقع پر پہنچ گئے۔
ابتدائی تفتیش کے مطابق ملزم نے گھریلو تنازعہ کی بنیاد پر فائرنگ کر کے اپنے دو بچوں، ساس اور سسر کو قتل کیا، بعد ازاں خود کو فائر مار کر خودکشی کر لی۔ پولیس نے موقع سے شواہد اکٹھے کر کے لاشوں کو قانونی کارروائی کے لیے ہسپتال منتقل کر دیا ہے۔
ڈسٹرکٹ پولیس آفیسر اٹک نے واقعہ کی شفاف اور جامع تحقیقات کے احکامات جاری کرتے ہوئے کہا ہے کہ واقعہ کے تمام پہلوؤں کا باریک بینی سے جائزہ لیا جا رہا ہے۔ پولیس کی ٹیمیں مختلف زاویوں سے تفتیش میں مصروف ہیں جبکہ جائے وقوعہ کو مکمل طور پر محفوظ بنا لیا گیا ہے۔
