راولپنڈی جنوری 5(ٹی این ایس):راولپنڈی میں ملاوٹ مافیاکے خلاف کارروائی کرنے کے دوران پنجاب فوڈ اتھارٹی کی خواتین کو ہراساں کرنے پر ڈولفن فورس کے اہلکاروں کے خلاف پہلا مقدمہ درج کر لیا گیاہے ۔تفصیلات کے مطابق ڈولفن فورس کے اہلکاروں کے خلاف یہ مقدمہ تھانہ صدر بیرونی میں پنجاب فوڈ اتھارٹی کی فوڈ سیفٹی افسر صائمہ اکرام کی جانب سے درج کرایا گیا ہے ۔اس حوالے سے صائمہ اکرام نے بتایا کہ بدھ کی شام کو وہ اپنی ٹیم کے چار ارکان کے ہمراہ اڈیالہ روڈ پر ملاوٹ مافیا کے خلاف کارروائی اور معائنے کے لیے ایک نجی بیکری میں گئیں تو وہاں 5 افراد آگئے جنہوں نے اپنا تعارف رائل نیوز اور خبریں اخبار میں بطور صحافی کرایا اور ان کے کام میں مداخلت شروع کردی۔
انہوں نے بتایا کہ ان پانچوں افراد نے پنجاب فوڈ اتھارٹی کی ٹیم کو روکا اور ان سے کیمرے پر بیان دینے کا کہا اور غیر قانونی طور پر ویڈیو بھی ریکارڈ کرنا شروع کردی جبکہ اسی دوران ڈولفن فورس کے اہلکار بھی آگئے جنہوں نے ہراساں کرنا شروع کردیا فوڈ سیفٹی افسر نے بتایا کہ وہ ٹیم کے ہمراہ جب گاڑی میں آکر بیٹھیں تو ڈولفن فورس اوران پانچوں افراد نے گاڑی کو گھیر لیا اور ہراساں کرنا شروع کردیا جبکہ ڈرائیور دوست محمد کو زبردستی گاڑی سے نیچے اتار دیا گیا اور ڈولفن فورس کے اہلکاروں کی موجودگی میں ٹیم کی ویڈیو بنانا شروع کردی صائمہ اکرام نے بتایا کہ ڈولفن فورس کے اہلکاروں کے نام معلوم نہیں ہوسکے لیکن جعلی صحافیوں میں راجہ کامران، شہزاد قریشی، رمضان بخاری، محمد رشید اور زاہد مرزا شامل تھے۔
