حکومت نہ آئی تو کون سا آپ نے آسٹریلیا کی عدالتوں میں جانا ہے آنا تو یہیں پڑے گا ‘لاہور ہائیکورٹ

حلقہ این اے 57 سے سابق وزیر اعظم شاہد خاقان عباسی کی نااہلی کیس میں متعلقہ آر او کو آج ریکارڈ سمیت طلب کر لیا گیا
لاہور 04جولائی(ٹی این ایس) لاہور ہائیکورٹ نے قومی اسمبلی کے حلقہ این اے 57 سے مسلم لیگ (ن) کے رہنما و سابق وزیر اعظم شاہد خاقان عباسی کی نااہلی کیس میں متعلقہ آر او کو آج (جمعرات ) ریکارڈ سمیت طلب کرتے ہوئے ریمارکس دیئے کہ عباسی صاحب ،باتیں کرنی بندکردیں،آپ کی حکومت نہ آئی توانہی عدالتوں میں آناپڑے گا،آپ کسی آسٹریلیاکی عدالت میں پیش نہیں ہوں گے۔گزشتہ روز لاہور ہائیکورٹ میں حلقہ این اے 57 سے شاہدخاقان عباسی کی نااہلی فیصلے کیخلاف اپیل پر سماعت ہوئی۔ سابق وزیراعظم شاہد خاقان عباسی عدالت میں پیش ہوئے۔ وکیل شاہد خاقان عباسی نے کہا کہ ایپلٹ ٹربیونل کسی کو تاحیات نااہل نہیں کر سکتی۔عدالت نے سابق وزیراعظم شاہد خاقان عباسی سے استفسار کیا کہ نواز شریف کی نااہلی پر آپ نے کہا کہ میرے وزیراعظم نواز شریف ہی ہیں تو کیا آپ کو ایسا کہنا چاہیے تھا۔عدالت نے کہا کہ عباسی صاحب! ہم آپ سے بات کرنا چاہتے ہیں، حکومت کبھی کسی کی تو کبھی کسی اور کی ہوتی ہے، عدالتیں قانون کے مطابق چلتی ہیں، جج کی کرسی پر بیٹھنا اتنا آسان نہیں جتنا نظر آتا ہے، باتیں کرنی بند کر دیں، آپ کی حکومت نہ آئی تو انہی عدالتوں میں آنا ہے، آپ کسی آسٹریلیا کی عدالت میں پیش نہیں ہوں گے۔لاہور ہائیکورٹ نے ریمارکس دیئے کہ پیپلزپارٹی کے ساتھ جو ہوا آفرین ہے ان پر کہ انہوں نے کچھ نہیں کہا، آپ کی بھی اتنی ہی عزت ہے جتنی کسی اور کی، ہمارا کوئی ایجنڈا نہیں ہے، آپ اپنے ایجنڈے پر کام کریں لیکن عدلیہ کے خلاف بیان دینا بند کر دیں، آپ سابق وزیراعظم ہیں، سسٹم کو بچانے کی کوشش کریں، اگرچہ یہ معاملہ متعلقہ نہیں لیکن یہ باتیں کرنا ضروری ہے۔فاضل عدالت نے حلقہ این اے 57 سے شاہد خاقان عباسی کی نااہلی کیس میں آج (جمعرات ) متعلقہ آر او کو ریکارڈ سمیت طلب کرتے ہوئے سماعت ملتوی کر دی ۔