لندن اپریل 11 (ٹی این ایس): وکی لیکس کے بانی جولین اسانج کو ایکواڈور کے سفارتخانے میں 7 سال کی طویل سیاسی پناہ گزارنے کے بعد گرفتار کرلیا گیا ہے. برطانوی نشریاتی ادارے کے مطابق جولین اسانج کو لندن میں ایکواڈور کے سفارتخانے سے گرفتار کیا گیا ہے‘ میٹروپولیٹن پولیس سروس نے بتایا ہے کہ وکی لیکس کے بانی کو سینٹرل لنڈن پولیس اسٹیشن میں رکھا گیا ہے جہاں وہ اس وقت تک رہیں گے جب تک انہیں جلد از جلد ویسٹ منسٹر مجسٹریٹ کی عدالت میں پیش نہیں کیا جاتا.
پولیس نے مزید کہا کہ ایکواڈور کی حکومت کی جانب سے سیاسی پناہ واپس لینے کے بعد سفارتکار نے پولیس کو سفارتخانے میں بلایا‘واضح رہے کہ وکی لیکس کے بانی جنسی زیادتی کیس میں سوئڈن حوالگی سے بچنے کے لیے 7 سال سے لندن میں ایکواڈور کے سفارتخانے میں مقیم تھے، تاہم ان کی سیاسی پناہ ختم کرنے کے اعلان پر انہیں گرفتار کرلیا گیا. میٹروپولیٹن پولیس کا کہنا ہے کہ عدالت کے سامنے سرنڈر کرنے میں ناکام ہونے پر جولین اسانج کو گرفتار کیا گیا‘ادھر ایکواڈور کے صدر لینن مورینو کا کہنا ہے کہ بین الاقوامی قوانین کی مسلسل خلاف ورزیوں کے بعد جولین اسانج کی سیاسی پناہ واپس لے لی گئی ہے.
تاہم وکی لیکس کی جانب سے ایک ٹوئٹ کی گئی کہ ایکواڈور کی جانب سے بین الاقوامی قوانین کی خلاف ورزی کرتے ہوئے غیر قانونی طور پر جولین اسانج کی سیاسی پناہ کو ختم کیا گیا. دوسری جانب برطانوی سیکرٹری داخلہ ساجد جاوید نے ٹوئٹ کرتے ہوئے اس بات کی تصدیق کی کہ پولیس نے وکی لیکس کے بانی کو گرفتار کرلیا ہے. اپنی ٹوئٹ میں انہوں نے لکھا کہ اس بات کی تصدیق کرتا ہوں کہ جولین اسانج پولیس کی حراست میں ہیں اور وہ برطانیہ میں انصاف کا سامنا کررہے ہیں.
انہوں نے لکھا کہ قانون سے کوئی بالاتر نہیں، میں تعاون پر ایکواڈور اور پیشہ وارانہ مہارت پر میٹ پولیس برطانیہ کا شکریہ ادا کرتا ہوں. 47 سالہ جولین اسانج نے سفارتخانے جو چھوڑنے سے انکار کرتے ہوئے دعویٰ کیا تھا کہ وکی لیکس کی سرگرمیوں کے لیے سوالات پر انہیں امریکا منتقل کیا جاسکتا ہے. گرفتاری سے متعلق برطانوی وزیر خارجہ سر ایلن ڈنکن کا کہنا ہے کہ اس سلسلے میں ہمارے دونوں ممالک کے درمیان جامع مذاکرات ہوئے‘اس بارے میں ایکواڈور کے صدر لینن مورینو نے مزید کہا کہ برطانیہ کی جانب سے ایکواڈور کو ضمانت دی گئی کہ جولین اسانج کو اس ملک کے حوالے نہیں کیا جائے گا جہاں موت کی سزا ہو.
لینن مورینو نے کہا کہ انسانی حقوق اور بین الاقوامی قوانین کے ساتھ ہمارے بھرپور عزم کے تحت میں نے برطانیہ سے درخواست کی کہ اس بات کی ضمانت دی جائے کہ جولین اسانج کو ایسے ملک کے حوالے نہیں کیا جائے جہاں انہیں تشدد یا سزائے موت کا سامنا کرنا پڑ سکتا ہو. انہوں نے بتایا کہ برطانوی حکومت نے اپنے قوانین کے مطابق تحریری طور پر اس بات کی تصدیق کی ہے.دسمبر2010میں انٹرپول نے انہیں عالمی مجرم قراردیتے ہوئے ان کی گرفتاری کے وارنٹ جاری کیئے تھے.
