ریاض اپریل 22 (ٹی این ایس): بین الاقوامی طور پر دہشت گرد قرار دی جانے والی عسکری تنظیم داعش نے گزشتہ روز سعودی عرب میں سیکورٹی فورسز کی عمارت پر ہونے والے حملے کی ذمہ داری قبول کرلی ہے. خیال رہے کہ حملے میں 3 حملہ آور ہلاک جبکہ سیکورٹی فورسز کے 3 اہلکار زخمی ہوئے تھے‘سعودی عرب کے سرکاری نشریاتی ادارے نے اپنی رپورٹ میں بتایا تھا کہ پولیس نے حملہ ناکام بنادیا تھا، یہ حملہ دارالحکومت ریاض سے شمال میں 250 کلومیٹر کے فاصلے پر قائم سیکورٹی فورسز کی عمارت میں کیا گیا تھا.
حملے کے بعد سوشل میڈیا پر جاری ہونے والی ویڈیو میں ہلاک مسلح حملہ آور کو دیکھا جاسکتا ہے جس کے قریب دھماکا خیز مواد بھی نظر آرہا ہے‘بعد ازاں داعش سے تعلق رکھنے والے ادارے نے ایک ویڈیو جاری کی جس میں حملہ آوروں کو ”شہید“ قرار دیا گیا تاہم یہ واضح نہیں کہ یہ ویڈیو کب بنائی گئی تھی. مذکورہ ویڈیو میں ایک شخص سعودی عرب کے شاہی خاندان پر تنقید کررہا ہے اور اس حملے کو سعودی عرب، شام اور عراق میں مسلمانوں کو قید کیے جانے کا رد عمل قرار دیا گیا.
گزشتہ روز سعودی سیکورٹی فورسز نے دہشت گردوں کا حملہ ناکام بناتے ہوئے 4 مسلح دہشت گردوں کو ہلاک کرنے کا دعویٰ کیا تھا . اس سے قبل 9 اپریل کو سعودی عرب کے مشرقی صوبے میں سیکورٹی چیک پوسٹ پر دہشت گردوں نے حملہ کردیا تھا تاہم سیکیورٹی فورسز کی جوابی کارروائی میں 2 دہشت گرد ہلاک کردیے گئے تھے جبکہ 2 کو گرفتار کرلیا گیا تھا. رواں برس 10 جنوری کو سعودی خفیہ ایجنسی نے کارروائی کرتے ہوئے 6 مشتبہ افراد کو ہلاک کرنے کا دعویٰ کیا تھا‘تاہم 9 اپریل کو ہونے والی کارروائی کے بارے میں سعودی حکام کا کہنا تھا کہ مارے جانے والے دہشت گرد قطیف میں ہونے والے حملے میں ملوث تھے.
