سری نگر نومبر 26 (ٹی این ایس): قابض بھارتی فوج نے ایک بار پھر ریاستی دہشت گردی کا مظاہرہ کرتے ہوئے نام نہاد سرچ آپریشن کے دوران 3 کشمیری نوجوانوں کو شہید کر دیا ہے. کشمیر میڈیا سروس کے مطابق جنت نظیر وادی کے ضلع پلواما میں سرچ آپریشن کے دوران 3 نوجوانوں کو شہید کر دیا گیا، بھارتی فوج نے نوجوانوں کی لاشوں کو لواحقین کے حوالے کرنے سے منع کردیا اور شہید ہونے والوں کو دہشت گرد ثابت کرنے کی مذموم کوشش کی.
عینی شاہدین اور علاقہ مکین قابض بھارتی فوج کے دعوﺅں کی قلعی کھولتے ہوئے احتجاجاً سڑکوں پر نکل آئے اور پر امن مظاہر کیا جسے سبوتاژ کرنے کے لیے قابض بھارتی فوج نے آنسو گیس کی شیلنگ اور ہوائی فائرنگ کی جب کہ پیلٹ گن کا بے دریخ استعمال کیا گیا جس کی زد میں آکر درجنوں مظاہرین زخمی ہوگئے. علاقہ مکینوں کا کہنا تھا کہ بھارتی فوج نے داخلی و خارجی راستوں کو بند کرکے سرچ آپریشن کے دوران گھر گھر تلاشی کے نام پر چادر و چار دیواری کا تقدس پامال کیا، خواتین کی بے حرمتی، بزرگوں کی تذلیل اور بچوں کو ڈرایا دھمکایا جب کہ قانونی تقاضوں کو پورا کیے بغیر 4 نوجوانوں کو گرفتار کرکے اپنے ہمراہ لے گئے.
دوسری جانب قابض بھارت کا لاک ڈاﺅن 114 ویں روز میں داخل ہوگیا ہے‘قابض بھارتی فوج نے ضلع پلواما میں محاصرہ کر کے گھر گھر تلاشی لی اور فائرنگ کر کے 3 کشمیریوں کو شہید کر دیا. خواتین پر تشدد کے خاتمے کے عا لمی دن کے حوالے سے رپورٹ کے مطابق 1989ءسے اب تک ریاستی دہشت گردی میں 2 ہزار 377 خواتین کو شہید کیا گیا ہے. کشمیری میڈیا کے مطابق مقبوضہ کشمیر کے ضلع پلواما میں بھارتی قابض افواج نے 3 کشمیری نوجوانوں کو شہید کر دیا اور محاصرہ کر کے علاقے میں گھر گھر تلاشی لی‘بھارتی فوج نے پلواما میں گزشتہ روز سے محاصرہ کر رکھا ہے، گھر گھر تلاشی کے عمل کے دوران قابض بھارتی فوج نے فائرنگ کر کے 3 کشمیری نوجوانوں کو شہید کیا، بھارتی فوج اب بھی علاقے میں موجود ہے.
بھارتی فوج کے تازہ مظالم کے خلاف اہلِ علاقہ نے احتجاج شروع کر دیا ہے‘بھارتی فورسز نے سوپور میں گھر گھر تلاشی کے دوران 5 نوجوان کو گرفتار کر لیا‘دوسری جانب سری نگر کے علاقے صورہ میں کریک ڈاﺅن آپریشنز کے دوران بھارتی فورسز ڈرونز اور موٹر بوٹس کا استعمال کر رہی ہیں. بھارتی مظالم کیخلاف کشمیریوں نے مزاحمت جاری رکھی ہوئی ہے، سری نگر اور اس کے نواحی علاقوں میں سول نافرمانی کی ہدایت والے پوسٹرز لگادیئے گئے ہیں‘کشمیریوں سے پوسٹرز کے ذریعے بھارت مخالف مظاہرے جاری رکھنے پر زور دیتے ہوئے غیر قانونی بھارتی اقدامات کے خلاف سول نافرمانی کی اپیل کی گئی ہے.
ادھر کشمیر میڈیا سروس کی جانب سے جاری کی گئی رپورٹ کے مطابق 1989ءسے اب تک ریاستی دہشت گردی میں 2 ہزار 377 خواتین کو شہید کیا گیا ہے‘رپورٹ میں کہا گیا ہے کہ تنازع کشمیر کی وجہ سے کشمیری خواتین بری طرح متاثر ہوئی ہیں، قابض بھارتی فورسز کی جانب سے 30 سالوں میں 2ہزار 377 خواتین شہید کی گئیں، 11 ہزار175 خواتین کی عصمت دری کی گئی جبکہ 22 ہزار 910 خواتین کو بیوہ کیا گیا. رپورٹ میں یہ بھی کہا گیا ہے کہ آسیہ اندرابی، فہمیدہ صوفی سمیت 6 کشمیری خواتین مسلسل بھارتی جیلوں میں نظر بند ہیں.
