کراچی دسمبر 20(ٹی این ایس): مالی سال 2018۔19کا وفاقی بجٹ مئی میں پیش کیا جائے گا،وزارت خزانہ نے وفاقی بجٹ 2018 کا سرکلرجاری کردیا ہے۔ذرائع کے مطابق وزارتِ خزانہ نے آئندہ بجٹ کی تیاری کا عمل شروع کر دیاہے،سرکلر کے مطابق وزارت خزانہ نے آئندہ مالی سال کے تخمینے بھی مانگ لیے ہیں، وزارت خزانہ نے تین سال وسط مدتی پالیسی 2018۔21 کے تخمینے بھی مانگ لیے۔سرکلر کے مطابق ترجیحی کمیٹیوں کے اجلاس اپریل کے پہلے ہفتے میں ہوں گے، سالانہ منصوبہ بندی و ترقی کمیٹی کا اجلاس اپریل کے وسط میں ہوگا جبکہ قومی اقتصادی کونسل کا اجلاس اپریل کے آخری ہفتے میں ہوگا۔
وزارت خزانہ نے ترقیاتی بجٹ کے تخمینہ جات 14 مارچ تک طلب کرلیے اور رواں مالی سال کے نظر ثانی شدہ اہداف بھی مانگ لیے۔وزارت خزانہ کے اعلامیے کے مطابق تمام محکموں کواپریل 2018 کے آخر تک بجٹ تجاویزوزارت خزانہ جمع کرانے کی ہدایت کی گئی ہے۔وزارت خزانہ کے اعلامیہ کے مطابق فنانس ڈویژن تمام بجٹ دستاویز، شیڈولز اور سمریاں اپریل تک کابینہ کو پیش کردے گی۔وزارت خزانہ کے مطابق مالی سال2018۔19کے وفاقی بجٹ کی منظوری کا وقت اہم ہے کیونکہ قومی اسمبلی اپنی 5 سالہ مدت 31 مئی 2018 کو مکمل کررہی ہے۔ اعلامیہ کے مطابق بجٹ اسٹریٹیجی پیپر کابینہ کو منظوری کے لیے فروری میں پیش کیا جائے گا جبکہ قومی اقتصادی کونسل کا اجلاس اپریل میں منعقد کیا جائے گا۔اعلامیہ کے مطابق اسحاق ڈار کے میڈیکل چھٹیوں پر ہونے کی وجہ سے اس وقت وزارت خزانہ کا قلمدان وزیراعظم کے پاس ہے۔
