, وزیراعظم عمران خان ویژنری لیڈر ہیں جنہوں نے آنے والی نسلوں کیلئے آفات سے محفوظ پاکستان بنانے کا جامع پروگرام دیا ہے , , وزیر مملکت برائے موسمیاتی تبدیلی زرتاج گل کا قومی اسمبلی میں بجٹ پر بحث کے دوران اظہارخیال
اسلام آباد جون 21 (ٹی این ایس): وزیر مملکت برائے موسمیاتی تبدیلی زرتاج گل نے کہا ہے کہ سیاسی وفاداریاں تبدیل کرنے والوں کا راستہ روکنا چاہیے، اگر ایسا نہ کیا گیا تو مسلم لیگ (ن) کی ساری صف خالی ہو جائے گی‘ وزیراعظم عمران خان ویژنری لیڈر ہیں جنہوں نے آنے والی نسلوں کیلئے آفات سے محفوظ پاکستان بنانے کا جامع پروگرام دیا ہے۔ جمعہ کو قومی اسمبلی میں بجٹ پر بحث میں حصہ لیتے ہوئے زرتاج گل نے کہا کہ خواجہ آصف اور خورشید احمد شاہ نے کہا کہ سیاست کے حوالے سے ضابطے ہونے چاہئیں‘ یہ اچھی بات ہے انہیں غور کرنا چاہیے کہ اگر سیاسی وفاداریاں تبدیل کرنے والوں کا راستہ نہ روکا گیا تو ان کے پیچھے والی اکثر سیٹیں خالی ہو جائیں گی۔
ہم تحریک انصاف میں تھے اور رہیں گے۔ انہوں نے کہا کہ 40 سال سے پانی کے بارے میں کوئی منصوبہ بندی نہیں کی گئی۔ بھارت پانی روک کر ڈیم بناتا رہا اور یہ انہیں ساڑھیاں اور آم بھیجتے رہے۔ انہوں نے کہا کہ ہمارا وزیر خزانہ تبدیل کرنے کی بات کی گئی لیکن خود آپ نے اپنے پانچ وزراء خزانہ تبدیل کردیئے۔ پیپلز پارٹی نے تو اپنا وزیراعلیٰ بھی تبدیل کردیا تھا۔
زرتاج گل نے کہا کہ کہا گیا کہ بجٹ آئی ایم ایف کا تیار کردہ ہے لیکن آپ لوگ تو سات مرتبہ آئی ایم ایف کے پاس گئے تو کیا اس وقت یہ جائز تھا۔ انہوں نے کہا کہ 70 سالوں سے بجٹ پیش ہو رہے ہیں اور تقریریں ہو رہی ہیں لیکن پہلی دفعہ غریب دوست بجٹ پیش کیا گیا ہے۔ نوجوانوں کے لئے سو ارب روپے کا انتظام کیا ہے۔ معاشرے کے ہر طبقے کی فلاح کے لئے اقدامات اور بجٹ رکھا گیا ہے ۔
انہوں نے کہا کہ ریاست مدینہ کی بنیاد رکھنے پر وزیراعظم کو مبارکباد پیش کرتی ہوں۔ وزیر مملکت نے کہا کہ فخر ہے کہ وزیراعظم عمران خان ویژنری لیڈر ہیں‘ انہوں نے قدرتی آفات کے تدارک کے لئے جامع پروگرام دیا ہے۔ اس سلسلے میں 7.8 ارب روپے قدرتی آفات اور موسمیاتی تبدیلی سے نمٹنے کے لئے مختص کئے گئے ہیں جبکہ دس ارب روپے کا صاف و سرسبز پاکستان پروگرام بھی شروع کیا گیا ہے۔ انہوں نے کہا کہ آنے والی نسلیں یاد رکھیں گی کہ انہیں آفات سے محفوظ پاکستان دیا گیا ہے۔ انہوں نے کہا کہ پہلی مرتبہ سرائیکی علاقہ اور بلوچستان کے لوگوں کی بھی سنی گئی ہے۔ ڈیرہ غازی خان سمیت جنوبی پنجاب میں سات یونیورسٹیاں بنائی جائیں گی۔ ہر ضلع میں ایک بڑا ہسپتال تعمیر کیا جائے گا۔
