جسٹس علی اکبرقریشی آج سماعت کرینگے/نیب آرڈیننس 1999ء کے غیر موثر قانون کے تحت دی گئی سزاؤں کو کالعدم قرار دینے کی استدعا
لاہور جولائی 18(ٹی این ایس) لاہور ہائیکورٹ میں سابق وزیر اعظم محمد نواز شریف، مریم نواز اور کیپٹن (ر) محمد صفدر کی سزاؤں کے خلاف دائر درخواست سماعت کیلئے مقرر کر دی گئی ۔لاہور ہائیکورٹ کے جسٹس علی اکبرقریشی آج ( جمعرات ) 19جولائی کوسماعت کریں گے۔
درخواست پاکستان لائرز فاؤنڈیشن نے ایڈووکیٹ اے کے ڈوگر کی وساطت سے دائر کی تھی جس میں نیب آرڈیننس 1999ء پر مختلف نوعیت کے اعتراضات اٹھائے گئے ہیں۔وکیل نے نشاندہی کی کہ جنرل (ر) پرویز مشرف نے 12 اکتوبر 1999ء میں منتخب حکومت ختم کر کے اقتدار پر قبضہ کیا اور ایک آرڈیننس کے تحت احتساب کیلئے نیب کا ادارہ قائم کیا، آئین معطل کر کے پی سی او کے تحت نظام حکومت چلایا، وکیل کے مطابق 18ویں ترمیم کی منظوری کے بعد جنرل مشرف کے اقدامات کو ملنے والا قانونی تحفظ ختم ہوگیا۔ اب نیب آرڈیننس کے ذریعے لوگوں ہراساں کیا جا رہا ہے ،3باروزیراعظم بننے والے نواز شریف کو اس قانون کے تحت سزادی گئی جوختم ہوچکا،نیب قانون غیر موثر ہو چکا ہے ، اس کے تحت سزا نہیں دی جاسکتی تھیلہٰذا اس مردہ قانون کے تحت نواز شریف ، مریم نواز اور کیپٹن (ر) صفد ر کو دی جانے والی سزائیں کالعدم قرار دی جائیں ۔
